सूक्ष्म सिंचन योजना : शेतकऱ्यांसाठी २५३ कोटींचा निधी मंजूर
राज्य शासनाने सूक्ष्म सिंचन योजनेंतर्गत शेतकऱ्यांसाठी २५३ कोटी ८४ लाख रुपयांचा निधी वितरित करण्यास मंजुरी दिली आहे. ही रक्कम “राष्ट्रीय कृषी विकास योजना – प्रति थेंब अधिक पीक” या योजनेअंतर्गत मंजूर करण्यात आली आहे. केंद्र सरकारने यामध्ये ६०% तर राज्य सरकारने ४०% हिस्सा उचलला आहे.
योजनेतील निधी वाटप
२०२४-२५ या आर्थिक वर्षासाठी “प्रति थेंब अधिक पीक” योजनेसाठी ६६७ कोटी ५० लाख रुपयांचा निधी मंजूर झाला असून, त्यापैकी पहिल्या टप्प्यात २५३ कोटी ८४ लाख रुपये वितरित करण्याचे आदेश देण्यात आले आहेत.
- सर्वसाधारण प्रवर्गासाठी: २१३ कोटी १४ लाख रुपये
- अनुसूचित जातींसाठी: २२ कोटी ७२ लाख रुपये
- अनुसूचित जमातींसाठी: १७ कोटी ९८ लाख रुपये
लाभ कसा मिळणार?
लाभार्थी शेतकऱ्यांच्या बँक खात्यावर महाडीबीटी प्रणालीद्वारे निधी जमा केला जाणार आहे. यामुळे तुषार व ठिबक सिंचनासाठी शेतकऱ्यांना अनुदानाचा लाभ मिळेल.
अंमलबजावणी व रखडलेले अनुदान
२०१५-१६ पासून “प्रति थेंब अधिक पीक” योजना सुरू असून, यामध्ये शेतकऱ्यांना ठिबक व तुषार सिंचनासाठी अनुदान दिले जाते. मात्र, वेळेवर अनुदान न मिळाल्याने शेतकऱ्यांनी याबाबत आंदोलने केली होती. अलीकडेच कृषिमंत्री माणिकराव कोकाटे यांनी शेतकऱ्यांच्या अडचणी सोडवण्यासाठी अर्थमंत्री अजित पवार यांची भेट घेतली होती.
शेतकऱ्यांचा लाभाचा मार्ग मोकळा
राज्य शासनाच्या या निर्णयामुळे २०२४-२५ साली लाभार्थी शेतकऱ्यांना ठिबक व तुषार सिंचनासाठी अनुदान वेळेत मिळण्याचा मार्ग मोकळा झाला आहे.